ខេត្តបន្ទាយមានជ័យ៖ នៅថ្ងៃពុធ ទី០៩ ខែកក្កដា ឆ្នាំ២០២៥ ឯកឧត្តម អ៊ុំ រាត្រី អភិបាលខេត្តបន្ទាយមានជ័យ និងលោកជំទាវ អមដំណើរដោយមន្ត្រីរាជការ ក្រុមការងារចុះមូលដ្ឋានក្រុងសិរីសោភ័ណ និងសង្កាត់ទាំង៧ បានអញ្ជើញនាំយកនូវគ្រឿងបរិក្ខារ ដល់ព្រះសង្ឃសរុបចំនួន ២២វត្ត នៅក្នុងក្រុងសិរីសោភ័ណ ក្នុងឱកាសបុណ្យចូលព្រះវស្សា ដែលប្រារព្ធ ឡើងនាបរិវេណវត្ត គិរីជុំចម្ការខ្នុរ ស្ថិតសង្កាត់អូរអំបិល ក្រុងសិរីសោភ័ណ ខេត្តបន្ទាយមានជ័យ។ 
នាឱកាសដ៏ប្រពៃថ្លៃថ្លានោះដែរ ឯកឧត្តម អ៊ុំ រាត្រី និងលោកជំទាវ ព្រមទាំង ក្រមការងារ បានបូជាផ្កាភ្ញី ធូបទៀនថ្វាយចំពោះព្រះសម្មាសម្ពុទ្ធ និងបានស្តាប់ព្រះសង្ឃសូត្រមន្តបង្សុកូលឧទ្ទិសកុសល ជូនដល់ញាតិកាដែលបានចែកឋាន ទៅកាន់លោកខាងមុខ។ 
ជាមួយគ្នានោះឯកឧត្តម អ៊ុំ រាត្រី បានមានប្រសាសន៍ថា យើងទាំងអស់គ្នាបានរួបរួមរៀបចំកម្មវិធីបុណ្យប្រគេនគ្រឿងបរិក្ខារផ្សេងៗដល់ព្រះសង្ឃ នៅក្នុងឱកាសនេះ គឺស្របពេលដែល ព្រះសង្ឃ ចូលព្រះវស្សាចាប់ពីថ្ងៃ ១រោច ខែអាសាធ និងចេញព្រះវស្សានៅថ្ងៃ ១៥កើត ខែអស្សុជ គឺគម្រប់៣ ខែ។ 
ឯកឧត្តមបានបន្តថា យើងបានធ្វើបុណ្យរួមគ្នាយ៉ាងសប្បាយរីករាយនាពេលនេះ ដោយប្រទេសជាតិយើងមានសុខសន្តិភាពពេញលេញ ក្រោមការដឹកនាំរបស់សម្ដេចតេជោ ហ៊ុន សែន អតីតនាយករដ្ឋមន្ត្រី បច្ចុប្បន្ន ជាប្រធានព្រឹទ្ធសភា ជាពិសេសក្រោមការងារដឹកនាំប្រកបដោយភាវៃឆ្លាត បិនប្រសប់ សម្តេច មហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា។ ដូចនេះយើងទាំងអស់គ្នាត្រូវចូលរួមថែរក្សាសុខសន្តិភាពមួយនេះ ឱ្យបានគង់វង្សយូរអង្វែងកុំឱ្យបាត់បង់ទោះស្ថិតនៅក្នុងតម្លៃណាក៏ដោយ។ 
ក្នុងនាមជា ព្រះមន្ត្រីសង្ឃ ខេត្ត ស្រុកក្រុង និងព្រះសង្ឃទូទាំងខេត្ត ព្រះសមណៈញាណ ណាប់ ម៉ឺន ព្រះបាឡាត់គណខេត្ត បានថ្លែងអំណរគុណយ៉ាងជ្រាលជ្រៅ ចំពោះឯកឧត្តម លោកជំទាវ អស់លោក-កស្រី មន្ត្រីរាជការទាំងអស់ ដែលមានសទ្ធាជ្រះថ្លា ប្រគេនគ្រឿងបរិក្ខារដល់ព្រះសង្ឃទាំង ២២វត្តសម្រាប់ផ្គត់ផ្គង់ក្នុងពេលចូលព្រះវស្សាបីខែ។ ព្រះអង្គបន្តថា បុណ្យចូលព្រះវស្សា គឺជាបុណ្យដ៏សំខាន់ ក្នុងព្រះពុទ្ធសាសនា ដែលព្រះសម្មាសម្ពុទ្ធ អនុញ្ញាតឱ្យព្រះភិក្ខុសង្ឃ គង់ចាំព្រះវស្សាអស់រយៈពេលបីខែ ក្នុងវស្សានរដូវ។
សូមបញ្ជាក់ថា ចំពោះគ្រឿងបរិក្ខារ   ដែលប្រគេនជូនព្រះសង្ឃទាំង២២វត្ត ទូទាំងក្រុងសិរីសោភ័ណ ដោយក្នុង១ វត្ត ទទួលបាននូវអង្ករ ២ការ៉ុង , មីយេីង ៥កេស , ទឹកបរិសុទ្ធកម្ពុជា ៥កេស ភេសជ្ជៈ៥កេស , ទឹកត្រី-ទឹកស៊ីអ៊ីវ៥យួរ , ស្លាដក់ ១គូរ ទៀនវស្សា១គូរ រួមនឹងបច្ច័យក្នុងមួយវត្ត ៨៥មុឺនរៀល៕
ប្រភព៖ រដ្ឋបាលខេត្តបន្ទាយមានជ័យ