នាព្រឹកថ្ងៃសៅរ៍៤រោច​ ខែខែជេស្ឋ​ ឆ្នាំម្សញ់​ សប្តស័ក​ ព.ស២៥៦៩​ ត្រូវនឹងថ្ងៃទី១៤​ ខែមិថុនា​ ឆ្នាំ២០២៥នេះ​ ឯកឧត្ដម​ ប៉េង​ ពោធិ៍សា​ អភិបាល​នៃគណៈអភិបាលខេត្តស្វាយរៀង​ បានអញ្ជេីញជាអធិបតីក្នុងពិធីសម្ពោធដាក់ឱ្យប្រើប្រាស់ជាផ្លូវការ ផ្លូវបេតុងចំនួន ០១ខ្សែ ប្រវែង ១១គ.ម ស្ថាបនាលើផ្លូវក្រវ៉ាត់ព្រំដែន​ ចាប់ពីបង្គោលព្រំដែនលេខ ១៧១​ ដល់​ ១៧៥។
ពិធីនេះមានការអញ្ជេីញចូលរួមពី​ លោកអភិបាលរងខេត្ត​ លោកតំណាងក្រុមហ៊ុនដឹញូ វីនេទៀន រីហ្សត​ លោក លោកស្រីប្រធានមន្ទីរ-អង្គភាព តំណាងកងកម្លាំងទាំងបី ក្រុមប្រឹក្សាក្រុង គណៈអភិបាលក្រុង ក្រុមប្រឹក្សាសង្កាត់ មន្ត្រីរាជការ អស់លោក លោកស្រី អាជ្ញាធរ​មូលដ្ឋាន​ និងបងប្អូនប្រជាពលរដ្ឋសរុបប្រមាណ៥០០នាក់។ 
មានប្រសាសន៍ទៅកាន់ពិធីនេះ​ ឯកឧត្តមអភិបាលខេត្តបានបញ្ជាក់ជូនពីសារបាននៃការស្ថាបនាផ្លូវនេះថា​ ផ្លូវនេះ គឺជាកំណាត់ផ្លូវក្រវ៉ាត់ព្រំដែន ដែលរាជរដ្ឋាភិបាល បានស្ថាបនានៅក្នុងភូមិសាស្ត្រខេត្តស្វាយរៀង​ លាតសន្ធឹងចាប់ពីបង្គោលព្រំដែនលេខ ១៧១ ក្នុងសង្កាត់បាវិត ដល់បង្គោលព្រំដែនលេខ១៧៥ ក្នុងសង្កាត់ប្រាសាទ មានប្រវែង ១១គ.ម និងជាប្រភេទផ្លូវក្រាលក្រួសក្រហម ប៉ុន្តែកន្លងមក ផ្លូវនេះ បានទទួលរងនូវការខូចខាតមួយចំនួន ដោយសារការប្រើប្រាស់ផង និងដោយសារភ្លៀងផងនៅរដូវវស្សា​ ដោយមើលឃើញពីតម្រូវការចាំបាច់ នៃការប្រើប្រាស់ផ្លូវរបស់យើង ឆ្លើយតបទៅនឹងកំណើន ប្រជាជន កំណើន នៃការប្រើប្រាស់ និងបម្រើឲ្យការរីកចម្រើននៅក្នុងមូលដ្ឋាននិងជាពិសេសបំផុតដោយមានការជួយឧបត្ថម្ភគាំទ្រពីក្រុមហ៊ុន ដឹញូ វីនេទៀន រីហ្សត​ និងមានការឯកភាពពីកងវិស្វកម្ម អគ្គបញ្ជាការ ក្រសួងការពារជាតិ (ដែលជាអង្គភាពស្ថាបនាផ្លូវក្រវ៉ាត់ព្រំដែន)
និងបានសម្រេចធ្វើការកែលម្អ ដោយធ្វើការលើកកម្ពស់គុណភាពផ្លូវ ពីផ្លូវក្រាលក្រួសក្រហម ទៅជាផ្លូវបេតុង (បើគិតពីរយៈពេលដូចជាមិនដល់កន្លះឆ្នាំនោះទេ បានស្ថាបនារួចរាល់) ដែលយើងទាំងអស់គ្នា កំពុងសម្ពោធដាក់ឲ្យប្រើប្រាស់ជាផ្លូវការនាពេលនេះ ។ 
ឯកឧត្ដម​បន្តថា​ ក្នុងនាមអាជ្ញាធរខេត្ត សូមយកឱកាសនេះ ចូលរួមត្រេកអរ ចំពោះការទទួលបាននូវសមិទ្ធផលដ៏ថ្មីស្រឡាងនេះ ជាមួយអាជ្ញាធរមូលដ្ឋាន បងប្អូនប្រជាពលរដ្ឋរស់នៅសង្កាត់បាវិត និងសង្កាត់ប្រាសាទ ក៏ដូចជាបងប្អូនប្រជាពលរដ្ឋដែលធ្វើដំណើរតាមផ្លូវនេះ និងសូមថ្លែងនូវការអរគុណចំពោះក្រុមហ៊ុន ដឹញូ វីនេទៀន រីហ្សត ដោយបានចំណាយថវិកាយ៉ាងច្រើនសន្ធឹកសន្ធាប់ សរុបប្រមាណ២,៥លានដុល្លារ ក្នុងការជួយឧបត្ថម្ភទាំង ស្រុងដល់ការស្ថាបនាផ្លូវមួយខ្សែនេះ​ រួមជាមួយនិងការបំពាក់អំពូលភ្លើងសូឡាអមសងខាងផ្លូវប្រមាណជាង៣៦៨អំពូល។ 
សមិទ្ធផលទាំងនេះគឺពិតជាសរបញ្ជាក់ឲ្យឃើញពីវប្បធម៌ នៃការចែករំលែក និងស្មារតីរួបរួមសាមគ្គី និងកិច្ចសហប្រតិបត្តិការយ៉ាងល្អប្រសើររវាងរដ្ឋ និងវិស័យឯកជន ក្នុងកិច្ចគាំទ្រចំពោះគម្រោងអភិវឌ្ឍន៍ផ្សេងៗនៅក្នុងមូលដ្ឋានរបស់យើងជាពិសេសគឺនៅក្នុងផ្នែកហេដ្ឋារចនាសម្ព័ន្ធផ្លូវថ្នល់នេះតែម្ដង ។
ជាចុងបញ្ចប់នៃពិធីនេះដែរឯកឧត្តមអភិបាលខេត្តក៏បាននាំមកនូវអំណោយ (ក្នុងនោះក៏មានការចូលរួមពីក្រុមហ៊ុនផងដែរ) សម្រាប់​ជូនចែកជូនដល់លោកគ្រូ អ្នកគ្រូ សិស្សានុសិស្ស និងបងប្អូនប្រជាពលរដ្ឋ ក្នុងម្នាក់ៗ ទទួលបានសារ៉ុង ១ និងថវិកា ៥ម៉ឺនរៀល,ជូនរដ្ឋបាលក្រុងបាវិត​ ចាត់ចែងរៀបចំកម្មវិធី ចំនួន ៧លានរៀល,ជូនអធិការដ្ឋាននគរបាលក្រុង និងមូលដ្ឋានកងរាជអាវុធហត្ថក្រុង ក្នុង ១អង្គភាព   ២លានរៀល,ជូនផ្នែកសឹករងក្រុង សង្កាត់បាវិត និងសង្កាត់ប្រាសាទ ក្នុង ១អង្គភាព ១លានរៀល,ជូនប៉ុស្ដិ៍នគរបាលរដ្ឋបាលសង្កាត់ប្រាសាទ  ប៉ុស្តិ៍នគរបាលការពារព្រំដែនប្រាសាទ និងយោធាការពារព្រំដែនប្រាសាទ  ក្នុង ១អង្គភាព ៥សែនរៀល​ និងជូនដល់កម្លាំងប្រជាការពារ (សង្កាត់ប្រាសាទ) ៥សែនរៀលផងដែរ។