នាល្ងាច ថ្ងៃទី២២ ខែមីនា ឆ្នាំ២០២៤ លោកឧត្តមសេនីយ៍ឯក រ័ត្ន ស៊្រាង មេបញ្ជាការរង កងរាជអាវុធហត្ថលើផ្ទៃប្រទេស និងជាមេបញ្ជាការ កងរាជអាវុធហត្ថរាជធានីភ្នំពេពេញ បានរៀបចំពិធីជប់លៀង ជូនដល់កម្លាំងអាវុធហត្ថរាជធានីភ្នំពេញទាំងមូល ដែលបានលះបង់កម្លាំងកាយកម្លាំងចិត្តបំពេញភារកិច្ចយ៉ាងហត់នឿយ ពេញមួយឆ្នាំកន្លងមក និងជាការបង្កលក្ខណៈឲ្យកងកម្លាំង បានចូលរួមអបអរសាទរ ពិធីបុណ្យចូលឆ្នាំថ្មីប្រពៃណីជាតិខ្មែរជាមុន ដើម្បីទុកពេលវេលា ការពារប្រជាពលរដ្ឋក្នុងថ្ងៃបុណ្យចូលឆ្នាំជាក់ស្តែងមកដល់ ដែលនៅក្នុងពិធីនេះក៏មានការអញ្ជើញចូលរួមជាកិត្តិយសយ៉ាងច្រើនកុះករ ពីសំណាក់ ឯកឧត្តម លោកជំទាវ អ្នកឧកញ៉ា លោកឧកញ៉ា លោក លោកស្រី អាជីវករ ពាណិជ្ជករ ដែលតែងតែស្រលាញ់គាំទ្រ អាវុធហត្ថរាជធានីភ្នំពេញផងដែរ។ 

ព្រមជាមួយគ្នានោះ លោកឧត្តមសេនីយ៍ឯក រ័ត្ន ស្រ៊ាង ក៏បានមូលមតិគ្នាជាមួយអតីតមិត្តភក្តិរួមជំនាន់សាលាបាក់ទូកនាទសវត្សឆ្នាំ១៩៨០ គោរពអញ្ជើញ អតីតលោកគ្រូអ្នកគ្រូសាលាបាក់ទូកធ្លាប់បង្រៀនជំនាន់ពួកខ្លួន ដែលនៅមានវត្តមាន ចំនួន៤០នាក់ មកចូលរួមជួបជុំ ពិសារអាហាររួមគ្នា និងរៀបចំអំណោយជូនដល់ពួកគាត់ទាំង៤០នាក់ ដោយក្នុងម្នាក់ៗទទួលបាន ថវិកាចំនួន៥០ម៉ឺនរៀល, ទឹកក្រូចដប ០១កេស, ទឹកដោះគោបឺត ០១កេស រួមទាំងថ្នាំពេទ្យ០១ឈុត ។ កាយវិកាប្រកបដោយគុណធម៌ចំពោះអតីត លោកគ្រូអ្នកគ្រូ នាឱកាសនេះ គឺក្រុមអតីតមិត្តភក្តិរួមជំនាន់សាលាបាក់ទូក ផ្តួចផ្តើមប្រមូលផ្តុំគ្នាឡើង ដោយលោក ឧត្តមសេនីយ៍ឯក រ័ត្ន ស្រ៊ាង តែងតែប្រារព្ធធ្វើឡើងជារៀងរាល់ឆ្នាំ ចាប់តាំងពីឆ្នាំ២០១៤មក និងតែងតែបំពេញសកម្មភាពមនុស្សធម៌រួមគ្នា កសាងសមិទ្ធិផលនានាក្នុងសាលាបាក់ទូករួមគ្នា និងជាពិសេស គឺតែងតែរួមសាមគ្គី ចែករំលែក ធនធានជួយគ្នា គ្រប់ពេលដែល អតីតលោកគ្រូអ្នកគ្រូ និងមិត្តក្នុងក្រុម ជួបការលំបាក ស្របតាមពាក្យស្លោកប្រចាំក្រុម ដែលបង្កើតឡើងថា "សាមគ្គីមិត្តភាព បង្កើតចិត្តរមនា ចែករំលែកជួយគ្នា គ្រប់គ្រាលំបាក"៕