(បាត់ដំបង) យ៉ាងហោចណាស់ជនបរទេសប្រុសស្រីចំនួន០៩នាក់និងខ្មែរ០២នាក់បានរងរបួសធ្ងន់ស្រាលនៅក្នុងហេតុការណ៍គ្រោះថ្នាក់ចរាចរណ៍រវាងរថយន្តដឹកត្រីធុនធ្ងន់បុកប៉ះជាមួយរថយន្តទេសចរណ៍នៅវេលាម៉ោង ១៤និង១០នាទី ថ្ងៃទី១៦ .ខែមករា ឆ្នាំ២០២៥ នៅតាមបណ្តោយផ្លូវហាយវេ(បាហៃ)ស្ថិតក្នុងក្រុមទី១៧ ភូមិបោះពោធិ៍ ឃុំអូរដំបង១ ស្រុកសង្កែ ខេត្តបាត់ដំបង ។

ពលរដ្ឋនៅកន្លែងកើតហេតុបានប្រាប់ថា ករណីគ្រោះថ្នាក់ចរាចរណ៍ខាងលើនេះដែរបានកើតឡើងរវាងរថយន្តម៉ាក HYUNDAI COUNTY ដឹកអ្នកដំណើរធុនធំ ពណ៌សូកូឡា-ពងមាន់ ពាក់ផ្លាកលេខ ភ្នំពេញ3G-7569 បើកបរដោយបុរសម្នាក់ ដឹកភ្ញៀវជនជាតិអ៊ីតាលីប្រុសស្រី០៩នាក់ និងខ្មែរ០២នាក់ ទិសដៅពីជើងទៅត្បូង លុះមកដល់ចំណុចកើតហេតុបានឆ្លងផ្លូវភ្លាមនោះក៏មានរថយន្តម៉ាកHYUNDAI ដឹកត្រីធុនធំ ពណ៌ស ពាក់ផ្លាកលេខ ភ្នំពេញ3F-7956 បើកបរដោយបុរសម្នាក់ទិសដៅពីលិចទៅកើតបានជ្រុលចង្កូតទៅបុកពេញទំហឹងបណ្តាលអោយប៉ើងទៅបុកដើមក្រខុបរបួសធ្ងន់០៤នាក់និងស្រាល០២នាក់ ក្រៅពីនោះរងរបួសបន្តិចបន្តួចផងដែរ។

ក្រោយពេលកើតហេតុជនរងគ្រោះត្រូវបានយកទៅសង្គ្រោះនៅមន្ទីរពេទ្យភ្លាមៗ ដោយឡែករថយន្តទាំង០២គ្រឿងត្រូវបានកម្លាំងនគរបាលចរាចរណ៍ផ្លូវគោកខេត្តវាស់វែងយកទៅរក្សាទុកដើម្បីរងចាំដោះស្រាយតាមផ្លូវច្បាប់៕