រតនគិរី៖ នៅថ្ងៃពុធ ទី១៩ ខែមីនា ឆ្នាំ២០២៥ នៅស្នងការដ្ឋាននគរបាលខេត្តរតនគិរី បានរៀបចំកិច្ចប្រជុំបូកសរុបសភាពការណ៍លទ្ធផលប្រតិបត្តិការ ប្រចាំខែមីនា និងប្រកាសផ្ទេរភារកិច្ចតែងតាំងមុខតំណែងជូនមន្ត្រីនគរបាលជាតិ នៃស្នងការដ្ឋាននគរបាលខេត្តរតនគិរី" ក្រោមអធិបតីភាពភាពលោកឧត្តមសេនីយ៍ទោ អ៊ុង សុភាព ស្នងការនគរបាលខេត្តរតនគិរី តំណាងដ៏ខ្ពង់ខ្ពស់ ឯកឧត្តមនាយឧត្ដមសេនីយ៍អគ្គស្នងការនគរបាលជាតិ ក្នុងនោះសមាសភាពចូលរួម លោក-លោកស្រីស្នងការរង នាយ-នាយរងការិយាល័យ អធិការ-អធិការរងនគរបាលក្រុង-ស្រុកទាំង៩ មេបញ្ជាការវរសេនាតូចនគរបាលការពារព្រំដែនគោកលេខ៦២៣និងលេខ២០៣។ ក្រោយពីការសរុបរាយការស្តីពីលទ្ធផលសភាពការណ៍និងប្រត្តិបត្តិការនាខែកន្លងមករបស់លោកស្នងការរងផែនសេនាធិការ កម្មវិធីបន្តលោកស្នងការរងផែនការងារធនធានមនុស្សបានឡើងអានប្រកាស សេចក្តីសម្រេច ស្តីពីប្រកាសផ្ទេរភារកិច្ចតែងតាំងមុខតំណែងជូនមន្ត្រីនគរបាលជាតិរួមមាន៖ ថ្នាក់នាយការិយាល័យចំនួន៤រូប នាយផ្នែកចំណុះការិយាល័យ នាយផ្នែកចំណុះអធិការដ្ឋាន នាយប៉ុស្តិ៍ចំណុះអធិការដ្ឋាន នាយផ្នែកចំណុះវរការពារព្រំដែន សរុបចំនួន៣៦នាក់ ស្រី៣នាក់។ 

ក្នុងឱកាសដ៏មានតម្លៃនេះលោកឧត្តមសេនីយ៍ទោស្នងការបានធ្វើការកោតសរសើរនិងវាយតម្លៃខ្ពស់ចំពោះកិច្ចខិតខំប្រឹងប្រែងរបស់កងកម្លាំងក្នុងការបំពេញប្រតិបត្តិការក្នុងការបង្រា្កបបទល្មើសនានាបានទាន់ពេលវេលា និងបានផ្តល់ប្រសាសន៍ដឹកនាំដើម្បីពង្រឹងបន្ថែមនូវកិច្ចការសំខាន់ៗដូចជា៖ ពង្រឹងការងារសហការចុះត្រួតពិនិត្យចរាចរណ៍និងអាវុធជាតិផ្ទុះ ការងារគ្រប់គ្រងជនបរទេស ពង្រឹងការងារកិច្ចការប៉ុស្តិ៍រដ្ឋបាល។ 

ឆ្លៀតក្នុងឱកាសនេះលោកឧត្តមសេនីយ៍ទោស្នងការបានចូលរួមអបអរសាទរដល់មន្ត្រីដែលទើបបានទទួលតំណែងថ្មី និងបានផ្តល់ប្រសាសន៍ផ្តាំផ្ញើក្នុងការខិតខំស្វែងយល់រៀនសូត្រការងារបន្ថែមជាពិសេសត្រូវដើរឱ្យទាន់សភាពការណ៍នៃប្រព័ន្ធបច្ចេកវិទ្យាបន្ថែមលើនេះលោកបានចែករំលែកបទពិសោធន៍ចំពោះការងារគ្រប់គ្រងដឹកនាំកងកម្លាំងដែលប្រកបដោយការឯកភាពផ្ទៃក្នុង ការទំនាក់ទំនងល្អ ក្រមសីលធម៌វិជ្ជាជីវៈ ដើម្បីឈានទៅរកភាពជោគជ័យការងារជូនចំពោះអង្គភាព។

ប្រភព៖ ស្នងការនគរបាលខេត្តរតនគិរី