សាលាដំបូងរាជធានីភ្នំពេញ សម្រេចផ្តន្ទាទោសលើជនជាប់ចោទឈ្មោះ ជី មីង អាយុ៣៤ឆ្នាំ ឱ្យជាប់ពន្ធនាគារអស់មួយជីវិត និងពិន័យជាប្រាក់៩០លានរៀល ពីបទជួញដូរដោយខុសច្បាប់នូវសារធាតុញៀន។ នេះបើតាមសេចក្តីប្រកាសព័ត៌មាន របស់អ្នកនាំពាក្យ សាលាដំបូងរាជធានីភ្នំពេញ ដែលចេញនៅពីថ្ងៃទី៨មករា ឆ្នាំ២០២៥​​។ ក្នុងសេចក្តីប្រកាសព័ត៌មាន ពុំមានបញ្ជាក់ពីទំហំឬទម្ងន់គ្រឿងញៀនដែលជនជាប់ជួញដូរឡើយ។ សូមជម្រាបថា​ ក្រុមប្រឹក្សាជំនុំជម្រះ នៃ សាលាដំបូងរាជធានីភ្នំពេញ កាលពីចុងឆ្នាំ២០២៤កន្លងមក ​​បានប្រកាសជាសាធារណៈនូវសាលក្រមព្រហ្មទណ្ឌ​ដោយបានសម្រេចផ្តន្ទាទោស​លើជនជាប់ចោទចំនួន១០នាក់ឱ្យជាប់ពន្ធនាគារមួយជីវិតពីបទ ផលិត រក្សាទុក ដឹកជញ្ជូន ឬជួញដូរដោយខុសច្បាប់នូវសារធាតុញៀន៕