ខេត្តកណ្ដាល៖ព្រឹកថ្ងៃទី២២ ខែមីនា ឆ្នាំ២០២៥ ក្រុមហ៊ុន បារាយណ៍ ក្លូបល មេនើចម៉ិន ឯ.ក(Baray Global Management Co.,ltd)  បានរៀបចំកម្មវិធីវេទិកាធុរកិច្ច ក្រោមប្រធានបទ៖ “ដើមទុនធំទាំង៣ ច្នៃអាជីវកម្ម ធុនតូច និងមធ្យម ឱ្យបានជោគជ័យ”ស្ថិតនៅភូមិកោះគរ សង្កាត់រកាខ្ពស់ ក្រុងតាខ្មៅ ខេត្តកណ្តាល ដោយមានការអញ្ជើញចូលរួមពីរ លោក-លោកស្រី  ប្រធានក្រុមហ៊ុន ដៃគូសហការ ភ្ញៀវកិត្តិយសជាតិ និងអន្តរជាតិផងដែរ។
ថ្លែងក្នុងវេទិកាធុរកិច្ចនេះដែរ លោកស្រី អុឹង សៀកគីម អគ្គនាយិកា នៃក្រុមហ៊ុន បារាយណ៍ ក្លូបល មេនើចម៉ិន ឯ.ក បានអោយដឹងថា វេទិកាធុរកិច្ចនេះធ្វើឡើងដើម្បីគៀងគរប្រមូលផ្តុំការវិនិយោគ ដែលបង្កើតបាន ជាប្រព័ន្ធប្រតិបត្តិការវិស័យសិប្បកម្ម កសិ-ឧស្សាហកម្ម ស្របតាមស្តង់ដាឧស្សាហកម្ម ការបង្កើនច្រវាក់ផលិតកម្ម ការកែច្នៃផលិតផលកសិកម្មក្នុងស្រុក តាមរយៈការលើកកម្ពស់ស្តង់ជាផលិតផល គាំពារហិរញ្ញវត្ថុ គៀងគរ អ្នកវិនិយោគក្នុងស្រុក និងបរទេស ការជម្រុញការនាំចេញផលិតផលទៅកាន់ទីផ្សារ និងការចូលរួមចំណែកអភិវឌ្ឍន៍សេដ្ឋកិច្ចក្នុងតំបន់។
លោកស្រីបានបញ្ជាក់ថា៖ ក្នុងតំបន់ប្រមូលផ្តុំសហគ្រាសធុនតូច និងមធ្យម SME Cluster 4.0 គឺជាកន្លែង ចាប់ផ្តើមអនុវត្តបេសកកម្ម ដោយប្រមូលផ្តុំអ្នកច្នៃប្រឌិត កែច្នៃផលិតផលកសិកម្មដែលមានសក្តានុពល នៅតាម បណ្តាខេត្តនានាទូទាំងព្រះរាជាណាចក្រកម្ពុជា ឱ្យមកបោះទីតាំងរោងចក្រឧស្សាហកម្មនៅក្នុងខេត្តកណ្តាលនេះ ហើយនឹងប្រែក្លាយទៅជាថាមពលផលិតប្រកបដោយគំនិតច្នៃប្រឌិត ប្រទេសកម្ពុជាបច្ចុប្បន្នមានការប្រកួតប្រជែងខ្ពស់ និងដើរទៅមុខលឿនរហ័សពេញទៅដោយការផ្លាស់ប្តូរ និងភាពរីកចម្រើនខ្លាំងផ្នែកបច្ចេកវិទ្យា ដែលវេទិកាធុរកិច្ចឧស្សាហកម្មទំនើបកម្មជំនាន់ថ្មី មានបេសកកម្មយ៉ាងមុតស្រួចក្នុងការបង្កើនកិច្ចគាំទ្រ ដល់ម្ចាស់សិប្បកម្ម ក្នុងស្រុកតាមរយៈការលើកកម្ពស់ស្តង់ដាផលិតផល គាំពារហិរញ្ញវត្ថុ និងតំណភ្ជាប់ទៅកាន់ទីផ្សារអន្តរជាតិ ព្រមទាំងទីផ្សារហាឡាល់ផងដែរ។
លោកស្រីបានបន្តថា៖ ស្របតាមប្រសាសន៍ណែនាំរបស់ ឯកឧត្តម គួច ចំរើន អភិបាល នៃគណៈអភិបាលខេត្តកណ្តាល បេសកកម្មរបស់ក្រុមហ៊ុន Baray Global Management មកទល់ពេលនេះក្រុមហ៊ុន បានឈានដល់ការភ្ជាប់ទំនាក់ទំនងជាមួយនឹង ក្រុមហ៊ុន Worldbridge Industrial Development Co., Ltd. និងក្រុមហ៊ុន BRIDGE BANK PLC. ក្នុងការជួយសម្របសម្រួលទៅដល់ ម្ចាស់អាជីវកម្មទាំងធុនតូច និងមធ្យម ដោយការបង្កើតយុទ្ធសាស្ត្រហិរញ្ញវត្ថុ ដើម្បីគាំទ្រអាជីវកម្ម ដែលអាច ទទួលបានការគាំពារផ្នែកហិរញ្ញវត្ថុប្រកបដោយប្រសិទ្ធភាព និងទទួលបានប្រសិទ្ធផល។
លោកស្រីអគ្គនាយិកានៃក្រុមហ៊ុន បន្តថា៖ ដើម្បីជាការរួមចំណែកសម្រេចគោលដៅរបស់រាជរដ្ឋាភិបាល ក្រុមហ៊ុន Baray Global Management បាន កំណត់ចេញនូវគោលដៅ និងសកម្មភាពអាទិភាពចំនួន៥ សម្រាប់ផែនការ៥ឆ្នាំ ២០២៥-២០២៩៖ទី១៖ ជំរុញពិពិធកម្មវិស័យនាំចេញផលិតផលពីកម្ពុជាទៅកាន់ទីផ្សារពិភពលោកទី២៖ ជំរុញ និងបង្កើនឧស្សាហកម្មផលិតកម្ម និងកែច្នៃ ជួយដល់អាជីវកម្មធន់តូច និងមធ្យម(ស្របតាមស្តង់ដារហាឡាល់ និងច្បាប់អាជីវកម្មនៃព្រះរាជាណាចក្រកម្ពុជា)ទី៣ ៖ ពង្រឹង និងពង្រីកតំណភ្ជាប់ ទាំងក្នុងនិងក្រៅប្រទេស (បណ្ដុំសហគ្រាស និងវិនិយោគទុន)ទី៤៖ បង្កើន និងបង្កើតសក្តានុពលការងារ (ធនធានមនុស្សអោយមានចំនេះនិងជំនាញ រឹង និងទន់)ទី៥៖ អភិវឌ្ឍន៍បច្ចេកវិទ្យា ដើម្បីបង្កើនប្រសិទ្ធភាព និងប្រសិទ្ធផល ក្នុងការផលិត និងផ្គត់ផ្គង់ទីផ្សារ។