កំពង់ចាម ៖នាថ្ងៃទី១៧ ខែមីនា ឆ្នាំ២០២៥

ឯកឧត្តម យុន ឈុន្នី រដ្ឋលេខាធិការក្រសួងមហាផ្ទៃ បានជំរុញដល់មន្ត្រីរដ្ឋបាលថ្នាក់ក្រោមជាតិ ឱ្យបន្តកិច្ចសហការ ផ្តល់នូវការគាំទ្រ និងចូលរួមអនុវត្តផែនការយុទ្ធសាស្ត្រ ស្តីពីការអនុវត្ត គោលនយោបាយ «ភូមិ-ឃុំ-សង្កាត់មានសុវត្ថិភាព» របស់រាជរដ្ឋាភិបាល ឱ្យទទួលបានជោគជ័យថ្មីៗបន្ថែមទៀត

ការជំរុញបែបនេះ ក្នុងកិច្ចប្រជុំដកបទពិសោធន៍ការងារផ្សព្វផ្សាយ និងការអនុវត្តរគោលនយោបាយ «ភូមិ-ឃុំ-សង្កាត់មាន សុវត្ថិភាព» ខេត្តកំពង់ចាម ព្រៃវែង ព្រះវិហារ ពោធិសាត់ និងខេត្តរតនគីរី ដែលពិធីនេះប្រារព្ធធ្វើឡើង នៅសាលាខេត្តកំពង់ចាម។

នាឱកាសនោះ ឯកឧត្តម អ៊ុន ចាន់ដា អភិបាល នៃគណៈអភិបាលខេត្តកំពង់ចាម បានជំរុញដល់អាជ្ញាធរ ពាក់ព័ន្ធទាំងអស់ ត្រូវថែរក្សាឱ្យបាននូវសន្តិសុខសណ្តាប់ធ្នាប់សាធារណៈ ជាពិសេសគឺ សុខសន្តិភាព និងការអនុវត្តគោលនយោបាយភូមិឃុំ សង្កាត់ មានសុវត្ថិភាព ។

ឯកឧត្តម អភិបាលខេត្ត បន្ដថា ដើម្បីសម្រេចបាន នូវចក្ខុវិស័យរយៈពេលខ្លី រយៈពេលមធ្យម និងរយៈពេលវែង ខេត្តត្រូវធ្វើការងាររួមមាន៖

ទី១-ត្រូវ ថែរក្សាឱ្យបាននូវសន្តិសុខសណ្តាប់ធ្នាប់សាធារណៈ

ទី២-ត្រូវពង្រឹងគុណភាព ទាំងប្រសិទ្ធភាពនៃ ការផ្តល់សេវាសាធារណៈ

ទី៣-ត្រូវជំរុញក្នុងការអភិវឌ្ឍ ការចាប់ដៃគូវិនិយោគ ដើម្បីផ្តល់នូវ ឱកាសការងារជូនប្រជាពលរដ្ឋរបស់យើង ឱ្យទទួលបានសេដ្ឋកិច្ចបន្ថែម ទី៤-គឺត្រូវចូលរួម គ្រប់កម្មវិធីកែទម្រង់របស់រាជរដ្ឋាភិបាល ជាពិសេសគឺ កំណែទម្រង់វិមជ្ឈការ និងវិសហមជ្ឈការ ដែលជាការងាររបស់យើងទាំងអស់គ្នា។

ជាមួយគ្នានោះ ឯកឧត្តម យុន ឈុន្នី រដ្ឋលេខាធិការក្រសួងមហាផ្ទៃ ក៏បានជំរុញដល់មន្ត្រីរដ្ឋបាលថ្នាក់ក្រោមជាតិ ឱ្យបន្តកិច្ចសហការ ផ្តល់នូវការគាំទ្រ និងចូលរួមអនុវត្តផែនការយុទ្ធសាស្ត្រ ស្តីពីការអនុវត្ត គោលនយោបាយ «ភូមិ-ឃុំ-សង្កាត់មានសុវត្ថិភាព» របស់រាជរដ្ឋាភិបាល ឱ្យកាន់តែសកម្ម ឱ្យទទួលបានជោគជ័យថ្មីៗបន្ថែមទៀត ដើម្បីដំណើរការអភិវឌ្ឍសេដ្ឋកិច្ច សង្គមកិច្ចនៅមូលដ្ឋាន និងឈានទៅបង្កើនល្បឿននៃការកាត់បន្ថយភាពក្រីក្រ ព្រមទាំងរួមចំណែកក្នុងការអនុវត្ត ប្រកបដោយជោគជ័យនូវគោលដៅអភិវឌ្ឍន៍ ប្រកបដោយចីរភាពនៅកម្ពុជាផងដែរ ៕

ប្រភព៖ រដ្ឋបាលខេត្តកំពង់ចាម