នារសៀលថ្ងៃទី៧ ខែមីនា ឆ្នាំ២០២៥ ឯកឧត្តម វង្ស ផាណាត ប្រធានក្រុមប្រឹក្សាខេត្ត និងឯកឧត្តម ម៉ាង ស៊ីណេត អភិបាល នៃគណៈអភិបាលខេត្តព្រះសីហនុ បានអញ្ជើញដឹកនាំមន្ត្រីចុះពិនិត្យទីតាំងកសិដ្ឋានដាំបន្លែ ហ័រណុងហួយ អេកូឡូជីខល ឯ.ក ស្ថិតនៅភូមិចាំស្រី ឃុំកំពង់សីលា ស្រុកកំពង់សីលា ខេត្តព្រះសីហនុ។
កសិដ្ឋានដាំបន្លែ ហ័រណុងហួយ អេកូឡូជីខល ឯ.ក មានផ្ទៃដីជាង ៣ហិកតា ធ្វើការដាំដុះបន្លែ ផ្លែឈើមានដូចជា ផ្លែទំពាំងបាយជូរ ម្ទេស ប៉េងប៉ោះ ខាត់ណាស្រួយ ផ្ទី កាឆាយ ដើមជន្លង់ ត្រសក់ និងស្រះចិញ្ចឹមត្រី និងដំណាំរួមផ្សំមួយចំនួនទៀត ហើយមជ្ឈមណ្ឌលកសិដ្ឋាននេះ បានរៀបចំចាប់ផ្តើមកាលពីខែមករា ឆ្នាំ២០២៤ ដោយផ្តោតសំខាន់ការដាំដុះបន្លែធម្មជាតិ គ្មានជាតិគីមី នេះជាការចាប់ផ្តើមសាកល្បងដាំដុះតែប៉ុណ្ណោះ ព្រោះនៅតំបន់នេះវាមានអំណោយផលល្អ ក្នុងការដាំដុះបន្លែ ផ្លែឈើធម្មជាតិដែលគ្មានជាតិគីមី ចំពោះដីវិញ យើងធ្វើដោយខ្លួនឯង គឺមានធាតុផ្សំដូចជា អាចម៌គោ អាចម៌មាន់ អាចម៌ទា ដី និងអង្កាមយកលាយផ្អាប់ជាការស្រេច។ដោយឡែកចំពោះម្ទេស យើងអាចប្រមូលផលជាបណ្តើរៗក្នុងមួយថ្ងៃចំនួន ២០០គីឡូក្រាម នៅខែមេសាខាងមុខ យើងអាចប្រមូលផលមានការកើនឡើងជិត ១ ០០០គីឡូក្រាម ហើយនេះជាការចាប់ផ្តើមសាកល្បងតែប៉ុណ្ណោះ យើងនឹងបន្តពង្រីកកសិដ្ឋានរបស់យើងបន្ថែមទៀតនៅពេលខាងមុខ។
ឯកឧត្តម ម៉ាង ស៊ីណេត អភិបាលខេត្តព្រះសីហនុ បានថ្លែងអំណរគុណកសិដ្ឋានដាំបន្លែ ហ័រណុងហួយ អេកូឡូជីខល ឯ.ក ដែលបានជឿជាក់លើរាជរដ្ឋាភិបាលកម្ពុជា ក្នុងការបោះទុនវិនិយោគលើដំណាំបន្លែផ្លែឈើធម្មជាតិនៅក្នុងស្រុកកំពង់សីលានាពេលនេះ ហើយកសិដ្ឋានជួយបង្កើនការងារជូនបងប្អូនប្រជាពលរដ្ឋអ្នកស្រុកកំពង់សីលា និងធ្វើការនាំចូលបន្លែផ្លែឈើទាំងអស់នេះចូលទីផ្សារក្នុងខេត្តព្រះសីហនុ និងបន្តធ្វើការចែកចាយទៅកាន់បណ្តាទីផ្សារនៅក្នុងរាជធានី ខេត្ត ក្នុងព្រះរាជាណាចក្រកម្ពុជា ជាពិសេសចូលរួមកាត់បន្ថយការនាំចូលបន្លែផ្លែឈើពីប្រទេសជិតខាង ដែលមានផលប៉ះពាល់ដល់សុខុមាលភាពអ្នកបរិភោគ។
ក្នុងឱកាសនោះ ឯកឧត្តម អភិបាលខេត្ត បានធ្វើការគាំទ្រឱ្យកសិដ្ឋានពង្រីកអាជីវកម្មរបស់ខ្លួនបន្ថែមទៀត ដើម្បីកំណើនការងារជូនប្រជាពលរដ្ឋខេត្តព្រះសីហនុ ហើយរដ្ឋបាលខេត្ត និងរង់ចាំជួយសម្របសម្រួលបញ្ហាប្រឈមនានានៅក្នុងកសិដ្ឋានគ្រប់ពេលវេលា និងសូមជូនពរឱ្យកសិដ្ឋានដំណើរការដាំដុះបន្លែផ្លែឈើធម្មជាតិប្រកបដោយផ្លែផ្កាល្អបន្ថែមទៀតនៅពេលខាងមុខ៕