ព្រឹកថ្ងៃទី២៧ ខែកុម្ភៈ ឆ្នាំ២០២៥ ពិធីប្រកាសសមាសភាពសាខាមូលនិធិជាតិជំនួយសង្គមខេត្តព្រះសីហនុ និងជួបសំណេះសំណាលជាមួយថ្នាក់ដឹកនាំ និងមន្ត្រីរាជការនៃមន្ទីរ ស.អ.យ. សាខាមូលនិធិជំនួយសង្គម និងសាខាជនពិការខេត្តព្រះសីហនុ ក្រោមអធិបតីភាព ឯកឧត្តម ជា សុមេធី រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា ឯកឧត្តម វង្ស ផាណាត ប្រធានក្រុមប្រឹក្សាខេត្ត និងឯកឧត្តម ម៉ាង ស៊ីណេត អភិបាល នៃគណៈអភិបាលខេត្តព្រះសីហនុ។
ឯកឧត្តម ម៉ាង ស៊ីណេត អភិបាល នៃគណៈអភិបាលខេត្តព្រះសីហនុ បានមានប្រសាសន៍កោតសរសើរនិងវាយតម្លៃខ្ពស់ចំពោះថ្នាក់ដឹកនាំមន្ត្រីរាជការ បុគ្គលិក នៃមន្ទីរសង្គមកិច្ច អតីតយុទ្ធជន និងយុវនីតិសម្បទាខេត្ត សាខាមូលនិធិជាតិជំនួយសង្គម និងសាខាមូលនិធិជនពិការ ដែលបានខិតខំអស់កម្លាំងកាយចិត្តប្រាជ្ញាស្មារតីក្នុងការបំពេញតួនាទីភារកិច្ចការផ្ដល់សេវាសង្គមកិច្ចនានាបានល្អប្រសើរជូនប្រជាពលរដ្ឋ ជាពិសេសការអនុវត្តកម្មវិធីជាតិជំនួយសង្គមដែលត្រូវបានដាក់ឱ្យអនុវត្តការពារថែមេសា ឆ្នាំ២០២៤ កន្លងមកនេះ។ 
ជាមួយគ្នានេះឯកឧត្តមអភិបាលខេត្ត ក៏បានអបអរសាទរចំពោះលោកស្រី សំម ឌីណា ត្រូវបានថ្នាក់ដឹកនាំក្រសួងសង្គមកិច្ច អតីតយុទ្ធជន និងយុវនីតិសម្បទា ផ្ដល់សេចក្ដីទុកចិត្តតែងតាំងជាប្រធានមូលនិធិជាតិជំនួយសង្គមខេត្តព្រះសីហនុ។ក្រោមការដឹកនាំប្រកបដោយឧត្ដមគតិ ស្វាហាប់ ឈ្លាសវៃ ម៉ត់ចត់ ម៉ឺងម៉ាត់ ប៉ិនប្រសប់ និងការប្ដេជ្ញាចិត្តយ៉ាងមោះមុតបំផុត របស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានបន្តពង្រឹងប្រព័ន្ធគាំពារសង្គម ឱ្យមានលក្ខណៈប្រមូលផ្ដុំ និងសង្គតិភាពទាំងក្នុងប្រព័ន្ធជំនួយសង្គម ប្រព័ន្ធសន្តិសុខសង្គម រួមទាំងអភិវឌ្ឍប្រព័ន្ធគាំពារសង្គម ឈរលើស្មារតី(មិនបោះបង់ពលរដ្ឋខ្មែរណាម្នាក់) ដូចនេះហើយរដ្ឋបាលខេត្តព្រះសីហនុ បានចូលរួមតាមដានជំរុញគាំទ្រអនុវត្តកម្មវិធីនយោបាយ និងយុទ្ធសាស្ត្របញ្ចកោណដំណាក់កាលទី១ ដែលកំណត់យកអាទិភាពគន្លឹះទាំង៥ គឺ(មនុស្ស ផ្លូវ ទឹក ភ្លើង និងបច្ចេកវិទ្យា)និងផែនការរៀបចំដែនដីខេត្តព្រះសីហនុ ក្នុងចក្ខុវិស័យឆ្នាំ២០៣៨)គឺរៀបចំ និងអភិវឌ្ឍខេត្តព្រះសីហនុជាទីក្រុងស្នូល នៃប៉ូលអភិវឌ្ឍជាតិ ប្រកបដោយចីរភាព នៅតំបន់ឆ្នេរសមុទ្រកម្ពុជា ក្នុងការជំរុញកំណើនសេដ្ឋកិច្ចអភិវឌ្ឍន៍ធុរកិច្ច ពាណិជ្ជកម្ម និងទេសចរណ៍ប្រកបដោយភាពរស់រវើក ឆ្លាត និងបរិយាបន្ន។
ក្នុងឱកាសនេះផងដែរ ឯកឧត្តម ជា សុមេធី រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា បានចូលរួមអបអរសាទរជាមួយ លោក លោកស្រី ដែលទើបទទួលបានការតែងតាំងថ្មីជាប្រធាន អនុប្រធាន និងថ្នាក់ដឹកនាំ នៃមូលនិធិជាតិជំនួយសង្គមខេត្ដព្រះសីហនុ និងបានធ្វើពិធីប្រកាសចូលកាន់តំណែងជាផ្លូវការនៅពេលនេះ ដើម្បីដឹកនាំការងារបន្ដ បំពេញតួនាទីជាសេនាធិការឱ្យក្រសួងសង្គមកិច្ច អតីតយុទ្ធជន និងយុវនីតិសម្បទា និងមូលនិធិជាតិជំនួយសង្គម មូលនិធិជនពិការ ក្នុងការផ្ដល់សេវាជូនប្រជាពលរដ្ឋនៅក្នុងខេត្ដព្រះសីហនុ។ ការទទួលភារកិច្ចថ្មីនេះ គឺជាការរែកពុននូវកិច្ចការសំខាន់ៗដែលក្រសួងសង្គមកិច្ច អតីតយុទ្ធជន និងយុវនីតិសម្បទា បាននឹងកំពុងពុះពារសម្រេចឱ្យបានស្របតាមតួនាទីភារកិច្ចរបស់ក្រសួង។
លើសពីនេះទៀត ក្នុងឱកាសបិទសន្និបាតបូកសរុបលទ្ធផលការងារឆ្នាំ២០២៣ និងទិសដៅអនុវត្តការងារ ឆ្នាំ២០២៤ របស់ក្រសួងសង្គមកិច្ច អតីតយុទ្ធជន និងយុវនីតិសម្បទាសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ក៏បានផ្តល់នូវអនុសាសន៍ ១៥ចំណុច ដល់ក្រសួងសង្គមកិច្ច អតីតយុទ្ធជន និង យុវនីតិសម្បទា និងក្រសួង ស្ថាប័នពាក់ព័ន្ធ ក្នុងគោលបំណងតម្រង់ទិស ធានាដល់ការសម្រេចបាននូវគោលដៅជាយុទ្ធសាស្ត្ររបស់រាជរដ្ឋាភិបាល ដែលបច្ចុប្បន្នក្រសួងកំពុងត្រួតពិនិត្យវឌ្ឍនភាពនៃការអនុវត្តអនុសាសន៍នេះ ជាមួយអគ្គនាយកដ្ឋាន និងអង្គភាពជំនាញក្រោមឱវាទ។
ទន្ទឹមនឹងនេះក្រសួង បាននិងកំពុងរៀបចំការពិនិត្យ ឡើងវិញ ការវិភាគមុខងារ និងកែសម្រួលរចនាសម្ព័ន្ធនានារបស់ក្រសួង ដើម្បីឱ្យសមស្របនឹងតួនាទីភារកិច្ចសំខាន់ របស់ខ្លួន កាន់តែឆ្លើយតបទាន់ពេលវេលាចំពោះតម្រូវការរបស់ប្រជាពលរដ្ឋ សំដៅលើកកម្ពស់ប្រសិទ្ធភាពក្នុងការគ្រប់គ្រង ការផ្តល់សេវា សង្គមកិច្ច និងអភិបាលកិច្ចវិស័យសង្គមកិច្ច៕