ទីស្តីការក្រសួងមហាផ្ទៃ៖ នៅថ្ងៃព្រហស្បតិ៍ ទី១៣ ខែកុម្ភៈ ឆ្នាំ២០២៥ លោកជំទាវ គឹម សេដ្ឋានី រដ្ឋលេខាធិការប្រចាំការក្រសួងអប់រំ យុវជន និងកីឡា បានអញ្ជើញធ្វើបទបង្ហាញស្តីពីការផ្ទេរមុខងារក្នុងវិស័យអប់រំ ទៅឱ្យរដ្ឋបាលក្រុង ស្រុក ខណ្ឌ ក្នុងអង្គសន្និបាតត្រួតពិនិត្យ​លទ្ធផលការងារឆ្នាំ២០២៤ និងលើកទិសដៅការងារឆ្នាំ២០២៥ របស់ក្រសួងមហាផ្ទៃ និងបូកសរុបចលនាប្រឡងប្រណាំងអនុវត្ត គោលនយោបាយ “ភូមិ-ឃុំ-សង្កាត់មានសុវត្ថិភាព។

ក្នុងឱកាសនៃការធ្វើបទបង្ហាញខាងលើ លោកជំទាវ គឹម សេដ្ឋានី បានលើកឡើងចំណុចគោលធំៗចំនួន ០២ ដោយក្នុងនោះរួមមាន សាវតានៃការផ្ទេរមុខងារក្នុងវិស័យអប់រំ និងការពង្រីកការផ្ទេរមុខងារនៅទូទាំងប្រទេស។ តាមការបញ្ជាក់របស់លោកជំទាវ សម្រាប់ការពង្រីកការផ្ទេរមុខងារនៅទូទាំងប្រទេស ក្រសួងអប់រំ យុវជន និងកីឡា បានបែងចែកចេញជា ០៤ចំណុចធំៗ ដែលមានដូចជា (១). ការផ្ទេរធនធានមនុស្ស (២). ការផ្ទេរធនធានហិរញ្ញវត្ថុ និងទ្រព្យសម្បត្តិរដ្ឋ (៣). គោលការណ៍ បែបបទ និងនីតិវិធីសម្រាប់អនុវត្ត (៤). រចនាសម្ព័ន្ធ តួនាទី ភារកិច្ច និងគណនេយ្យភាព។

លោកជំទាវ បានបន្ថែមថា ក្រសួងអប់រំ យុវជន និងកីឡា បានចាប់ផ្តើមអនុវត្ត​ផែនការក្នុងការផ្ទេរមុខងារក្នុងវិស័យអប់រំ ទៅឱ្យរដ្ឋបាលក្រុង ស្រុក ខណ្ឌ ចាប់តាំងពីឆ្នាំ២០១៣ មក ដោយក្នុងនោះបានឆ្លងកាត់ដំណាក់កាលជាច្រើនរាប់ចាប់ពីដំណាក់កាលនៃការរៀបចំបញ្ជីវិភាគមុខងារ ការពិនិត្យមើលមុខងារឡើងឡើងវិញក្នុងឆ្នាំ២០១៣ និង២០១៤ រហូតដល់ការប្រគល់មុខងារពាក់ព័ន្ធនឹងការគ្រប់គ្រង ការអប់រំកុមារតូច ការអប់រំបឋមសិក្សា និងការអប់រំក្រៅប្រព័ន្ធទៅឱ្យរដ្ឋបាលក្រុង ស្រុក ក្នុងខេត្តបាត់ដំបងក្នុងឆ្នាំ២០១៦ និងការធ្វើសមាហរណកម្ម និងការផ្ទេរបុគ្គលិកនៃការិយាល័យអប់រំ យុវជន និងកីឡា ឱ្យទៅស្ថិតក្រោមចំណុះឱ្យរចនាសម្ព័ន្ធរបស់រដ្ឋបាលក្រុង ស្រុក ខណ្ឌទូទាំងប្រទេសក្នុងឆ្នាំ២០១៩ និងការបន្តអនុវត្តផែនការផ្សេងៗទៀតជាបន្តបន្ទាប់រហូតដល់បច្ចុប្បន្ន។

លោកជំទាវបានបន្តលើកឡើងទៀតថា ក្រសួងបាន​​​ពង្រីកការ​ផ្ទេរមុខងារនៅទូទាំងប្រទេស និងបានអនុវត្តផែនការក្នុងការ​ផ្ទេរធនធានហិរញ្ញវត្ថុ និងទ្រព្យសម្បត្តិរដ្ឋឱ្យរដ្ឋបាលក្រុង ស្រុក ខណ្ឌក្នុងឆ្នាំ២០២៤ និងអនុវត្តផែនការផ្ទេរធនធាន​មនុស្សជាមួយការផ្ទេរបុគ្គលិកអប់រំ និងគ្រូបង្រៀនប្រមាណ ៧៤,៧៤៣នាក់។ លោកជំទាវ បានបន្ថែមថា 

សម្រាប់គោលការណ៍ បែបបទ និងនីតិវិធីសម្រាប់អនុវត្ត ក្រសួងបានរៀបចំជាសៀវភៅបច្ចេកទេសស្តីពីគោលការណ៍ បែបបទ នីតិវិធីនៃការអនុវត្តមុខងារដែលបានផ្ទេរ ព្រមជាមួយការរៀបចំជាវគ្គបណ្តុះបណ្តាលជាលក្ខណៈតំបន់សម្រាប់រដ្ឋបាលក្រុង ស្រុក ខណ្ឌទូទាំងប្រទេសផងដែរ៕

ដោយ៖ អគ្គនាយកដ្ឋានបច្ចេកវិទ្យាឌីជីថល និងផ្សព្វផ្សាយអប់រំ