(បាត់ដំបង)ក្មេងប្រុសស្រី០២នាក់បងប្អូនបានស្លា-ប់យ៉ាងអាណោ-ចអា-ធ័មនៅក្នុងហេតុការណ៍គ្រោះអគ្គិភ័យឆេះផ្ទះលក់ចាប់ហួយ០១ខ្នងនៅវេលាម៉ោង ១១និង១០នាទី ថ្ងៃទី៣០ ខែមករា ឆ្នាំ២០២៥ នៅចំណុចក្រុម០១ ភូមិអង់ជើង ឃុំតាម៉ឺន ស្រុកថ្មគោល  ខេត្តបាត់ដំបង ។

ផ្ទះតូបលក់ចាប់ហួយដែលត្រូវ អគ្គិភ័យឆាបឆេះខាងលើមានទំហំ ៥ម៉ែត្រX១២ម៉ែត្រ សង់ផ្ទាល់ដី ធ្វើអំពីឈើ ប្រក់ស័ង្កសី ជញ្ជាំងស័ង្កសី ឆេះអស់ទាំងស្រុង និងស្លាប់កូនបង្កើតចំនួន ០២នាក់ ទី១-ឈ្មោះ សុីថា សាវឌី ភេទស្រី អាយុ ១២ឆ្នាំ និងទី២-ឈ្មោះ សុីថា សុវណ្ណដា ភេទប្រុស អាយុ ០៥ឆ្នាំ ដែលម្ចាស់ផ្ទះឈ្មោះ ហ៊ុន សុគន្ធី ភេទស្រី អាយុ ៤០ឆ្នាំ  រស់នៅកន្លែងកើតហេតុខាងលើ ។

តាមការបំភ្លឺរបស់ម្តាយបង្កើតថា នៅវេលាម៉ោង ១០និង៣០នាទី គាត់បានចាក់សោរខាងក្រៅទុកក្មេងនៅក្នុងផ្ទះហើយគាត់ចេញទៅដកស្មៅបន្លែនៅខាងក្រោយផ្ទះចំងាយប្រហែល ១៦០ម៉ែត្រ មួយសន្ទុះស្រាប់តែឮសូរផ្ទុះភឹងងាកមកផ្ទះឃើញភ្លើងឆេះអស់បាត់ទៅហើយ  ដែលនៅក្នុងផ្ទះមានសាំង០២ពីដុង ម៉ូតូ២គ្រឿងសាំងពេញ និងដបហ្គាសជាច្រើនដបទៀតផងដែរ ។  

សមត្ថកិច្ចបានបញ្ជាក់ថា នៅក្នុងហេតុការណ៍គ្រោះអគ្គិភ័យខាងលើនេះដែរ ភ្លាមៗនោះសមត្ថកិច្ចមិនបានចេញរថយន្តពន្លត់អគ្គិភ័យទេដោយសារពេលទទួលព័ត៌មានគឺឆេះអស់បាត់ហើយ៕