ខេត្តស្ទឹងត្រែង៖ព្រឹកថ្ងៃទី ២៩ ខែវិច្ឆិកា ឆ្នាំ២០២៥ រដ្ឋបាលខេត្ត បានសហការជាមួយ មន្ទីរកិច្ចការនារីខេត្តស្ទឹងត្រែង រៀបចំយុទ្ធនាការ១៦ថ្ងៃ ឆ្នាំ២០២៥ ក្រោមប្រធានបទ "រួមគ្នាបញ្ឈប់អំពើហិង្សាតាមបច្ចេកវិទ្យាឌីជីថល លើស្រ្តី និងក្មេងស្រី" ក្រោមអធិបតីភាព លោកជំទាវ កុត ប៊ុនមី សមាជិកក្រុមប្រឹក្សាខេត្ត លោកស្រី វិន ស៊ីធួន អភិបាលរង នៃគណៈអភិបាលខេត្ត លោកស្រី សន សុខា ប្រធានមន្ទីរកិច្ចការនារីខេត្ត នៅទីលាន តេជោធិបតី ក្រុងស្ទឹងត្រែង ដោយមានការចូលរួមពីមន្រ្តីរាជការ កងប្រដាប់អាវុធទាំង៣ប្រភេទ និងយុវជន សិស្សានុសិស្ស ប្រមាណជា១០០០នាក់ ។

យុទ្ធនាការនេះមានគោលបំណងបង្កើត និងលើកកម្ពស់ការយកចិត្តទុកដាក់ក្នុងការចូលរួមទប់ស្កាត់ ឆ្លើយតបចំពោះអំពើហិង្សាទាក់ទងនឹងយេនឌ័រពីអ្នកពាក់ព័ន្ធទាំងអស់រួមទាំងផ្នែកសាសនា សិល្បៈ និងវិស័យឯកជន។

ក្នុងឱកាសនោះផងដែរលោកស្រីវិនស៊ីធួន អភិបាលរងខេត្ត បានមានប្រសាសន៍ថា ដើម្បីឆ្លើយតបយុទ្ធសាស្ត្ររបស់រាជរដ្ឋាភិបាលគ្រប់នីតិកាល ការបន្តជំរុញអនុវត្តផែនការសកម្មភាពជាតិ ស្តីពីការទប់ស្កាត់អំពើហិង្សាលើស្ត្រី គឺសំដៅលុបបំបាត់ឥរិយាបថប្រើអំពើហិង្សាលើស្ត្រី និងពង្រីកវប្បធម៌ អហិង្សា ដើម្បីរួមចំណែកលើកកម្ពស់សីលធម៌សង្គម តម្លៃស្ត្រី និងគ្រួសារខ្មែរ ក៏ដូចជាកសាងគ្រួសារមានសុភមង្គល សហគមន៍ និងសង្គមជាតិ ។

លោកស្រីអភិបាលរងបានបន្ថែមថា ការបញ្ឈប់អំពើហិង្សាលើស្ត្រី និងក្មេងស្រី គឺអាចធ្វើទៅបានតាមរយៈការឆ្លើយតបជាពហុវិស័យទាមទារឱ្យមានការចូលរួមរបស់អ្នកពាក់ព័ន្ធ រួមទាំងស្ត្រីខ្លួនឯង។ សម្រាប់យុទ្ធនាការ ១៦ថ្ងៃ គឺធ្វើឡើងតាមរយៈសកម្មភាពនៃការជួបជុំ ការដើរហែក្បួន ក្នុងក្រុងនាពេលនេះ ជាវិភាគទានមួយដ៏មានសារៈសំខាន់ ក្នុងការចូលរួមកាត់បន្ថយអំពើហិង្សាទាក់ទងនឹងយេនឌ័រ ដើម្បីឆ្លើយតបទៅនឹងផែនការយុទ្ធសាស្ត្រអភិវឌ្ឍន៍ជាតិ របស់រាជរដ្ឋាភិបាលកម្ពុជា និងផែនការសកម្មភាពជាតិ ស្ដីពីការទប់ស្កាត់អំពើហិង្សាលើស្ត្រី ក្នុងគោលបំណង ជំរុញឱ្យមានសមភាព និងសមធម៌យេនឌ័រនៅក្នុងសង្គម និងធ្វើឱ្យប្រសើរឡើងនូវក្នុងទំនាក់ទំនងផ្នែកយេនឌ័រដើម្បីកាត់បន្ថយរាល់ទម្រង់អំពើហិង្សាលើស្ត្រី។

លោកស្រីអភិបាលរងខេត្ត បានសង្កត់ធ្ងន់ថា គោលនយោបាយភូមិឃុំ មានសុវត្ថិភាពរបស់រាជរដ្ឋាភិបាលកម្ពុជា ដែលបានដាក់ចេញនូវគោលការណ៍ណែនាំដើម្បីធានានូវសុវត្ថិភាព និងស្ថេរភាពជូនដល់ប្រជាពលរដ្ឋ ដែលក្នុងនោះអំពើហិង្សាលើស្ត្រីក៏ត្រូវបានដាក់បញ្ចូលផងដែរ។ ដូច្នេះការផ្លាស់ប្ដូរ និងការប្រកាន់ភ្ជាប់នូវការប្រព្រឹត្តិ និងឥរិយាបថជាវិជ្ជមាន គឺជាមធ្យោបាយដ៏មានប្រសិទ្ធភាពក្នុងការលើកកម្ពស់សមភាព និងសមធម៌យេនឌ័រ រវាងបុរស និងស្ត្រី៕

ប្រភព៖ រដ្ឋបាលខេត្តស្ទឹងត្រែង